ସରବାହାଲ UGME ସ୍କୁଲ ପରିସରରେ ଶିଶୁମାନଙ୍କ ପାଇଁ ଏକ ଭବ୍ୟ ‘ଖଡ଼ି ଛୁଆଁ’ ଓ ‘ପ୍ରବେଶ ଉତ୍ସବ’ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ଶ୍ରୀଯୁକ୍ତ ଆଦିତ୍ୟ ପୁଝାରୀ ମୁଖ୍ୟ ଅତିଥି ଏବଂ ଶ୍ରୀଯୁକ୍ତ ବସନ୍ତ କୁମାର ପଣ୍ଡା ଅତିଥି ଭାବେ ଯୋଗଦାନ କରିଥିଲେ। ମୁଖ୍ୟ ଅତିଥି ପ୍ରଦୀପ ପ୍ରଜ୍ଜ୍ୱଳନ କରି କାର୍ଯ୍ୟକ୍ରମର ଶୁଭାରମ୍ଭ କରିବା ସହ କୁନି କୁନି ପିଲାମାନଙ୍କୁ ସେମାନଙ୍କ ଉଜ୍ଜ୍ୱଳ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଥିଲେ।
ନୂତନ ଭାବେ ନାମ ଲେଖାଇଥିବା ଶିଶୁମାନଙ୍କୁ ସ୍କୁଲ ପକ୍ଷରୁ ଫୁଲ ଚନ୍ଦନ ଦେଇ ଭବ୍ୟ ସ୍ୱାଗତ କରାଯାଇଥିଲା। ସରବାହାଲ ତ୍ରିନାଥ ମନ୍ଦିରର ପୂଜକ ଶ୍ରୀ ଭଜ ବାବୁ ଓ ଅତିଥିମାନେ କୋମଳମତି ପିଲାମାନଙ୍କୁ ଖଡ଼ି ଧରାଇ ସେମାନଙ୍କ ଶିକ୍ଷା ଜୀବନର ଶୁଭାରମ୍ଭ କରିଥିଲେ। ଏହା ଏକ ମହାନ ସଂସ୍କାର ବୋଲି ପୂଜକ ମହାଶୟ ମତବ୍ୟକ୍ତ କରିଥିଲେ।
ଶିକ୍ଷା ମାଧ୍ୟମରେ ପିଲାମାନେ କିପରି ଦେଶର ଉତ୍ତମ ନାଗରିକ ହୋଇପାରିବେ, ସେ ବିଷୟରେ ଆଦିତ୍ୟ ବାବୁ ଓ ବସନ୍ତ ବାବୁ ମାର୍ଗଦର୍ଶନ ଦେଇଥିଲେ। ସ୍କୁଲ ଅଧ୍ୟକ୍ଷ ଶ୍ରୀ ତାପସ ମିଶ୍ର ଏବଂ ସମସ୍ତ ଶିକ୍ଷକ ଓ ଶିକ୍ଷୟିତ୍ରୀଙ୍କ ମିଳିତ ଉଦ୍ୟମରେ ଏହି ପ୍ରଶଂସନୀୟ ପ୍ରୟାସ କରାଯାଇଥିଲା। ଅଭିଭାବକମାନେ ମଧ୍ୟ ବହୁ ସଂଖ୍ୟାରେ ଉପସ୍ଥିତ ରହି ଶିକ୍ଷା ବ୍ୟବସ୍ଥା ପ୍ରତି ନିଜର ଉତ୍ସାହ ପ୍ରକାଶ କରିଥିଲେ। ପରିଶେଷରେ ମିଷ୍ଟାନ୍ନ ବଣ୍ଟନ କରାଯାଇ ଏହି ଆଧ୍ୟାତ୍ମିକ ତଥା ଶିକ୍ଷଣୀୟ ଉତ୍ସବ ସମାପ୍ତ ହୋଇଥିଲା।
0 Comments