ଏହି ଅଭିଯାନର ଏକ ଅଂଶସ୍ୱରୂପ, ସହରର ବିଭିନ୍ନ ସ୍ଥାନରେ ରାସ୍ତା କଡ଼ ଏବଂ ଡ୍ରେନ୍ ଉପରେ କରାଯାଇଥିବା ବେଆଇନ ଜବରଦଖଲ ଗୁଡ଼ିକୁ ମଧ୍ୟ ସମ୍ପୂର୍ଣ୍ଣ ଭାବେ ହଟାଯିବ। ପିକ୍ ଆୱାର ସମୟରେ ଯେତେବେଳେ ଅଧିକ ମାତ୍ରାରେ ଯାନବାହାନ ଚଳାଚଳ କରିଥାଏ ସେହି ସମୟରେ ସହରର ମୁଖ୍ୟ ରାସ୍ତାଗୁଡ଼ିକରେ ହେଉଥିବା ପ୍ରବଳ ଟ୍ରାଫିକ ଜାମ୍ ଏବଂ ଭିଡ଼ ନିୟନ୍ତ୍ରଣ ପାଇଁ ଏହି ନିଷ୍ପତ୍ତି ନିଆଯାଇଛି। ସାଧାରଣ ଜନତାଙ୍କ ପାଇଁ ଅଧିକ ସ୍ଥାନ ସୃଷ୍ଟି କରିବା ଏବଂ ଗମନାଗମନକୁ ସୁଗମ କରିବା ଲକ୍ଷ୍ୟରେ ଏହି ଉଚ୍ଛେଦ ପ୍ରକିୟା ଆଗାମୀ ଦିନରେ ଜାରି ରହିବ ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ ଯେ, ପୌର ପାଳିକା ପକ୍ଷରୁ ଗତ ୧୬.୦୯.୨୦୨୫ ରିଖରେ ଓଡ଼ିଶା ପୌର ନିୟମ (OMA, 1950) ର ଧାରା ୨୭୫ ଅନୁଯାୟୀ ସହରର ବିଭିନ୍ନ ବିପଦପୂର୍ଣ୍ଣ ଗୃହ ମାଲିକଙ୍କୁ ନୋଟିସ୍ ଜାରି କରାଯାଇଥିଲା। ଏଥିସହିତ ସମ୍ପୃକ୍ତ ଅଞ୍ଚଳ ଗୁଡିକରେ ମାଇକ ଯୋଗେ ବ୍ୟାପକ ପ୍ରଚାର ପ୍ରସାର କରାଯାଇ ଜନସାଧାରଣଙ୍କୁ ସଚେତନ କରାଯିବା ସହ ଅସୁରକ୍ଷିତ ଅଟ୍ଟାଳିକା ଖାଲି କରିବାକୁ କୁହାଯାଇଥିଲା। ପ୍ରଶାସନ ପକ୍ଷରୁ ବାରମ୍ବାର ସତର୍କ କରାଯିବା ସତ୍ତ୍ୱେ କେତେକ ସ୍ଥାନରେ କୌଣସି ସଂସ୍କାରମୂଳକ ପଦକ୍ଷେପ ନିଆଯାଇନଥିଲା।ମାତ୍ର କୌଣସି ସନ୍ତୋଷଜନକ ପଦକ୍ଷେପ ନିଆନଯିବାରୁ ପ୍ରଶାସନ ପକ୍ଷରୁ ଏହି ଚୂଡ଼ାନ୍ତ ନିଷ୍ପତ୍ତି ନିଆଯାଇଛି। ପୌର ପାଳିକା ଦ୍ୱାରା ପ୍ରସ୍ତୁତ କାର୍ଯ୍ୟସୂଚୀ ଅନୁଯାୟୀ, କାଳୀ ମନ୍ଦିର ରୋଡ୍, କଂସାରିପଡା, ପୁରୁଣାବସ୍ତି ଏବଂ ମାରୱାଡିପଡା ଅଞ୍ଚଳରେ ଥିବା ବିପଦପୂର୍ଣ୍ଣ ଗୃହ ଗୁଡିକୁ ପର୍ଯ୍ୟାୟକ୍ରମେ ଭଙ୍ଗାଯାଉଛି। ଏହି ଅଭିଯାନ ସମୟରେ ପୌର ପାଳିକାର ବରିଷ୍ଠ ଅଧିକାରୀମାନେ ଉପସ୍ଥିତ ରହିଥିଲେ। ଆଗାମୀ ଦିନରେ ସହରରେ ଥିବା ଅନ୍ୟ ସମସ୍ତ ବିପଦସଙ୍କୁଳ ନିର୍ମାଣ ଗୁଡିକ ଉପରେ ଏଭଳି କଡା ନଜର ରଖାଯିବ ବୋଲି ପୌର ପ୍ରଶାସନ ପକ୍ଷରୁ ସୂଚନା ମିଳିଛି।
0 Comments