ଓଡ଼ିଶା ରାଜନୀତିରେ ଭାରତୀୟ ଜନତା ପାର୍ଟି (ବିଜେପି) ପୁଣି ଥରେ ନିଜର ଦବଦବା ଜାହିର କରିଛି। ଦୀର୍ଘ ୧୨ ବର୍ଷ ପରେ ରାଜ୍ୟରେ ଅନୁଷ୍ଠିତ ହୋଇଥିବା ରାଜ୍ୟସଭା ନିର୍ବାଚନରେ ଶାସକ ଦଳର ରଣନୀତି ଆଗରେ ବିରୋଧୀ ବିଜେଡି ଓ କଂଗ୍ରେସର ମିଳିତ ଉଦ୍ୟମ ଧୂଳିସାତ୍ ହୋଇଛି। ଏହି ନିର୍ବାଚନରେ ୪ଟି ଆସନ ମଧ୍ୟରୁ ବିଜେପି ରାଜ୍ୟ ସଭାପତି ମନମୋହନ ସାମଲ ଏବଂ ସୁଜିତ କୁମାର ସହଜରେ ବିଜୟୀ ହୋଇଥିବା ବେଳେ, ବିଜେପି ସମର୍ଥିତ ସ୍ୱାଧୀନ ପ୍ରାର୍ଥୀ ଦିଲୀପ ରାୟ ମଧ୍ୟ ବାଜିମାତ୍ କରିଛନ୍ତି। ଅନ୍ୟପକ୍ଷରେ ବିଜେଡି କେବଳ ଗୋଟିଏ ଆସନରେ ସନ୍ତ୍ରୁପ୍ତ ମିଶ୍ରଙ୍କୁ ଜିତାଇବାରେ ସକ୍ଷମ ହୋଇଛି। କିନ୍ତୁ ବିଜେଡି ଓ କଂଗ୍ରେସର ମିଳିତ ପ୍ରାର୍ଥୀ ଡାକ୍ତର ଦତ୍ତେଶ୍ୱର ହୋତା ପରାଜିତ ହୋଇଛନ୍ତି। ସବୁଠାରୁ ବଡ଼ ଚର୍ଚ୍ଚାର ବିଷୟ ପାଲଟିଛି ବିରୋଧୀ ଶିବିରରେ ହୋଇଥିବା 'କ୍ରସ୍-ଭୋଟିଂ'। ସୂଚନା ଅନୁଯାୟୀ, ବିଜେଡିର ୬ ଜଣ, ୨ ଜଣ ନିଲମ୍ବିତ ବିଧାୟକ ଏବଂ କଂଗ୍ରେସର ୩ ଜଣ ବିଧାୟକ ଦଳୀୟ ନିର୍ଦ୍ଦେଶ ଅମାନ୍ୟ କରି ଭୋଟ୍ ଦେବାରୁ ଦିଲୀପ ରାୟଙ୍କ ବିଜୟ ପଥ ପରିଷ୍କାର ହୋଇଥିଲା। ଏହି ଘଟଣା ବିରୋଧୀ ଦଳରେ ଥିବା ଆଭ୍ୟନ୍ତରୀଣ କନ୍ଦଳ ଓ ଅସନ୍ତୋଷକୁ ପଦାରେ ପକାଇଛି। ନିର୍ବାଚନ ସମୟରେ ଘୋଡ଼ା ବେପାର ଅଭିଯୋଗ ଓ ଉତ୍ତେଜନାପୂର୍ଣ୍ଣ ପରିସ୍ଥିତି ଦେଖିବାକୁ ମିଳିଥିଲା। ତେବେ ଏହି ଫଳାଫଳ ପ୍ରମାଣିତ କରିଛି ଯେ, ଓଡ଼ିଶାରେ ବର୍ତ୍ତମାନ ବିଜେପିର ସ୍ଥିତି ଅତ୍ୟନ୍ତ ସୁଦୃଢ଼ ହୋଇଥିବା ବେଳେ ବିରୋଧୀ ଦଳର ରଣନୀତି ବିଫଳ ହୋଇଛି।
0 Comments